U3F1ZWV6ZTI2Mzk4NDY1NzMzX0FjdGl2YXRpb24yOTkwNTgxOTU4ODQ=

كل ما يتعلق بالعمل في الإمارات و الإقامة و المعيشة .. موضوع تاريخي

 وظائف دبي,وظائف في دبي,دبي,وظيفة,الامارات,وظائف دبي اليوم,وظائف العين,وظائف خالية بالامارات,وظائف شاغرة فى الامارات,وظائف دبى,وظائف في الامارات,وظائف شاغرة في الامارات,الامارات,الإمارات,دبي,عمل,العمل في الامارات,فرص عمل,الشارقة,وظائف في الامارات,السفر الى الامارات,الإمارات العربية المتحدة,وظائف,وظائف دبي,العمل بالامارات,العمل في دبي,عقد عمل في الإمارات,وظائف في دبي,دبى,عقود العمل في الامارات,الإقامة,الإمارات,الامارات,تأشيرة الإمارات,دبي,الاقامة في الامارات,اقامة,الشارقة,اقامة عمل في الامارات,اقامة حرة في الامارات,الاستثمار في الامارات,التجنيس في الامارات,الإمارات العربية المتحدة,الجنسية الاماراتية,الامارات,الإمارات,السفر الى الامارات,دبي,العمل,العمل في دبي,العمل فى الامارات,العمل في الامارات,العمل في الامارات 2019,السفر,العمل بالامارات,طلب العمل في الامارات,شروط العمل في الامارات وظائف,وظائف الامارات,الامارات,وظائف دبي,وظائف شاغرة,وظائف خالية,وظائف الإمارات,وظائف في الامارات,وظائف الامارات اليوم,وظائف في دبي,وظيفة,وظائف الشارقة,فرص عمل,وظائف شاغرة في الامارات,الإمارات,وظائف عمل,عقود,عقود العمل,الهجرة,العمل,عقد  السفر,عقود عمل,عقد عمل,عقد العمل,نماذج عقود العمل,أنواع عقود العمل

كل ما يتعلق بالعمل في الإمارات و الإقامة و المعيشة .. موضوع تاريخي

لو انت تايه ومش عارف تروح الإمارات ولا متروحش .. ومش عارف تعمل إيه عشان متخسرش فلوسك .. شووف المقالة دي للأخر . 


------------------------------------------------------

عشان تشتغل في الإمارات بيحصل حاجه من إتنين :
1- بيجيلك عروض و إنت قاعد في بلدك مُعزز مُكرم وتسافر علي شغل .

2- تروح هناك بفيزا سياحة شهر أو 3 شهور وتدور إنت بنفسك .

-----------------------------------------------------

أولاً : نتكلم علي الناس اللي بيجيلها عروض وهي فى مصر : 


مبدأياً نجاوب علي السؤال الذي حير ملايين الناس

أنا دكتور وجايلي عرض شغل في الإمارات بمرتب كذا اوافق ولا لاء ؟ 

انا مهندس وجايلي عرض شغل في الإمارات بمرتب كذا اوافق ولا لاء ؟ 
لما حد يجيله عقد عمل أو عرض عمل ومحتار يقبل ولا لأ 

لازم تفكر في 3 حاجات :

1- وضعك في مصر 

2- متوسط تكاليف المعيشة في المنطقة اللي إنت هتروحها هناك

3- هدفك أو طموحك من السفر 

----------------------------------.

رقم 1 : وضعك في مصر

لو انت أعزب وبتاخد 3000 أو 4000 جنيه في مصر 

لو انت متزوج و بتاخد 6000 أو 7000 جنيه في مصر

يعني حياتك في مصر شبه مستقره .. 

( مقولتش مستقره بشكل كامل بقول شبه مستقره ) 

مستورة يعنى ف مصر مش بتشحت بالمعنى الحرفى

ساعتها لما تحب تطلع برا يبقي تطلع علي حاجه مضمونه وأفضل وظيفياً وإجتماعياً من وضعك بتاع مصر 

ومينفعش مثلا تسيب المرتب ده عشان تروح تاخد 1000 أو 1500 درهم بس مثلاً فى دبي ؟! .

لكن أنا أسف لو إنت بتشحت فى مصر أو بتاخد يادوب 1000 جنيه في الشهر وقتها أي مرتب بأي وضع برا مصر هيكون أحسن من وضعك اللى فى مصر وتقبل بأي عرض يجيلك فوراً .
----------------------------------------------------

رقم 2 : متوسط تكاليف المعيشة فى المنطقة اللي هتروحها في الإمارات

لازم مرتبك اللي هتاخده ياريس في المكان اللى انت رايحه يكون على الأقل مغطى الحد الأدنى لمتوسط تكاليف المعيشة .

يعني مثلا مينفعش تقول عايز أعيش في المركز المالي أو دبي مارينا أو البارشاء فى دبي ومرتبك 1000 درهم بس .. معلش يعني إديني عقلك .. إزاى ؟

هتعيش إزاي بالمرتب ده و متوسط تكاليف المعيشة فى دبى عالية جداً جداً جداً مهو اكيد مش هيكفوا مهما عملت 

لازم تعرف الحد الأدنى من متوسط تكاليف المعيشة هناك ودة بتعرفه من هنا 


 وعلى أساس الحد الأدنى ده هتعرف تعمل تقييم للمرتب المعروض عليك وهل هيكفيك ولا لأ ؟.

و الموقع بيعرفك كل حاجه من أول الأكل والشرب والمواصلات وكل حاجه

----------------------------------------------

رقم 3 : طموحك وهدفك من السفر إيه ؟

لو طموحك هو التحويش و إنك تحط القرش على القرش عشان تهاجر بلد أفضل بعد كام سنة وقتها لازم تروح علي مرتب تعرف تحوش منه .. يعني بالبلدي لازم يدفعوا ليك ثمن غربتك اللي هتتغربها . 

لكن لو طموحك هو إنك واخد السفر ده مرحلة مبدئية بس عشان تخرج من مصر وبعد كدا ربنا يفتحها عليك وتترقي يبقي ساعتها هتقدم تنازلات عادي ومش شرط تاخد بدل سكن و بدل مواصلات و اوفر تايم وبتاع .. هتقدم تنازلات عشان تعرف تسافر وتاخد خطوة مبدئية . 

أما بقي لو طموحك الهروب من مصر وخلاص يبقي ساعتها إقبل بأى حاجة حتى لو عرضوا عليك إنك تشتغل بدون مقابل .. ما هو إنت عايز تهرب وخلاص بقي .

ده الملخص بإختصار .. إحسب حسبتك بناءً علي الـ تلت عوامل دووول وحدد قرارك بنفسك بدون الاستعانة بأي حد وطبعاً إستخير في الأول و فى الأخر ربنا سبحانه و تعالى .

بالمناسبة إبقي شوف العرض اللى معروض عليك ... هل عليهم تذكره الطيران والفيزا ولا لأ ؟؟ .. لأن فى أوقات كتير شركات بتدفعلك تذكرة الطيران كمان .

--------------------------------------------------------------------

ثانياً : الطريقة التانية إنك تروح بفيزا سياحة شهر أو 3 شهور وتدور إنت براحتك 

مبدأياً عشان تلاقى شغل بالطريقة دى لازم يكون عندك حاجتين :

1- انجليزى انجليزى انجليزى .. لازم يكون عندك لغة يا باشا .. 
وحياة النبي لازم تكون عارف إنجليزى :D

2- يكون معاك 50 ألف جنيه أو أكتر ( شاكب راكب كدا يا ريس ) عشان تعرف تعمل الرحلة دي ..

مش معاك الحاجتين دول يبقي عدي الموضوع ده ولا كأنك شوفته ومتفكرش ف الإمارات أصلاً إلا لما تكون جاهز .

نقول تاني عشان الناس اللي هتنصب عليك وتعملك البحر طحينة وتقولك روح دور علي شغل حتي لو مش معاك غير حق التذكرة بس .. و فى الأخر تنام في الجوامع وتكتب بوست علي صفحه الجالية المصرية فى دبى تشحت حق تذكره العودة 
معلش أنا صريح جداً جداً عشان عارف النصب والضحك علي عقول الناس بإسم النصيب والرزق و فى الأخر الناس تلبس في الحيط .

معاك إنجليزى كويس و معاك 50 أو 60 ألف جنيه عشان تعمل الطلعه دي و تروح تدور علي شغل تمام يا معلم .. روح وربنا يرزقك ويوفقك .. لكن لو ممعكش المبلغ ده ولا اللغة متروحش ولا تفكر أساساً في الامارات .
--------------------------------------------------------------

طيب أنا معايا المبلغ ده ومعايا لغة كويسة وكله تمام أطلع الفيزا إزاي و أسافر ؟؟؟ 

1- تطلع الفيزا من أي شركة سياحة في وسط البلد وبتاخدها بعد كام يوم

وخلي بالك الرينج بتاعها من 90 دولار ل 150 دولار علي حسب المدة بتاعتها عشان ميتنصبش عليك 
بالمصري من أول 1600 لحد 2500 جنيه 

المهم ما علينا .. لما بتوصل بالسلامة لازم تشتري شريحة موبايل عشان يبقي معاك رقم إماراتي تكتبه في ال CV بتاعك وهتلاقي شبكة إتصالات و شبكة du هناك مغرقين الدنيا .. 


* حمل تطبيق إسمه " وجهتي " من أي مكان فيه واي فاي مجاني عشان تعرف تروح الأماكن إزاي بأرخص الطرق ومن غير ما تتوه أو تدفع فلوس كتير . 

-----------------------------------------------------------------

طيب أديني وصلت و إتغديت و إستريحت و شربت الشاى كمان

أعمل إيه بقي عشان أدور على شغل ؟؟ 

أولاً : أنسب وقت عشان تدور علي شغل هناك من شهر أكتوبر لشهر أبريل ..

ليه مينفعش تدور على شغل فى الصيف هناك ؟؟

حضرتك الصيف هناك زى جهنم بالظبط و العياذ بالله .. الناس أصلاً في الصيف بتخش المولات بدل ما تسيح فى الحر و إنت راجل جاى تدور علي شغل يعني هتلف على رجلك و هتروح و تيجى و تنزل و تطلع .. فلازم تروح فالشتاء و فصل الخريف أحسن بكتير .

ثانياً : لازم تكون جاى و إنت معاك حاجتين ال CV بتاعك و شهادتك متوثقة : 

1- ال CV بتاعك لازم يكون أكثر من ورقة .. السي في الورقه الواحدة ده تعمله قرطاس لب و تشتغل بيه فى مصر لكن فى الخليج عموماً بيحبوا العنطزه الفارغه و لازم تملي عينهم بال CV بتاعك .

2- شهادتك الجامعية دي بتوثقها من أمين الجامعة ومكتب توثيق الخارجية والملحق الثقافي لسفارة الإمارات أو وزارة الخارجية الإماراتية لما توصل .


ثالثاً : فى 3 طرق عشان تلاقي شغل و إنت فى الإمارات : 

1- طريقة تقليدية : إنك تطبع ال CV بتاعك وتنزل تلف علي رجلك وتسلمه إيد ب إيد للشركات والمؤسسات المعروفة في تخصصك . 

2- طريقة شبه تقليدية : إنك بتروح تحضر مؤتمرات مجانية عن التوظيف والشغل من و إنت هناك فى الإمارات اللي بيسموها ( open day ) بيعملوها الشركات الكبيرة وغالبا بتبقى مجانية . 

3- طريقة حديثة : إنك تراسل الشركات و المؤسسات علي الإيميل من خلال مواقع التوظيف وتبعتلهم إيميلات بالسي في بتاعك أو تعمل إعلان فى جرايد التوظيف هناك .



* موضوع الإعلان في جرايد التوظيف زي جريدة الخليج أو Gulf News هناك مثلاً موضوع مش مُجدى وبتكون شركات متوسطه اللى هياخدوك من الجرايد دى وهيمصوا دمك على الفاضى .

الإعلان بيتكلف فى اليوم لو فى الخليج مثلاً 15 درهم يعني 75 جنيه يومياً .. لو فى  Gulf News فى اليوم 65 درهم يعنى 325 جنيه يومياً

( لو معاك فايض فلوس إعمله .. مش معاك بلاش منه ) 
و دوول جميع المواقع والصفحات الموثوقة و المضمونة اللى بتعرض شغل فى الإمارات :







الموقع اللى جاى ده هتلاقى فيه فرص عمل وكمان مشهور جداً إنك تلاقى فيه مكان تسكن فيه بالمواصفات و السعر اللى إنت عايزه 

---------------------------------------------------

طيب يا سيدي أنا خلاص عرفت أجيب شغل أعمل إيه عشان يبقى معايا إقامة ؟؟ 
قبل ما أقولك أنواع الإقامات هناك لازم تاخد بالك جداً جداً من حاجتين : 
الحاجة الأولى : الشغلانه بتاعتك دي سوقها عامل إزاى في الإمارات بمعني .. معدل الرواتب بتاعها قد إيه في الإمارات .. ليه لازم تعرف ؟؟

عشان أصحاب العمل هناك ميضحكوش عليك .. يكون مثلاً معدل الرواتب بتاع الشغلانة الفلانية اللي هتشتغلها 10000 درهم مثلاً وصاحب العمل يقولك هتاخد 5000 درهم بس .. كده هو بيقرطسك .. فلازم تعرف الشغلانة سوقها عامل إزاى قبل ما تتعاقد .


الحاجة التانية : تاخد بالك كويس من شروط ال ( offer letter ) و دى أكتر حاجة الناس بتلبس خوازيق فيها لأنها بتمضى على العقد من غير ما تشوف الشروط كويس 
---------------------------------------------------------------------------

مهم جداً جداً جداً

أولاً : الشركات بتعمل حاجة إسمها فترة التجربة ( عامل تحت التجربة ) بتبقي 6 شهور وبتكون موجودة فى العقد و هي إن من حق الشركة تمشيك من غير ما تدفعلك أي مستحقات و بدون أسباب .. 

قانوناً قانوناً و على الورق .. طول ما إنت فى فترة التجربة ملكش أي حق إنك تسيب الشغل وتمشي لكن صاحب العمل بس هو اللى ليه الحق إنه يمشيك بدون أي خسارة عليه . 
لكن لو تقدر تخلى الشركى يضيفوا بند إنك إنت كمان من حقك إنك تمشى فى أي وقت في فترة الإختبار دي عشان لو جالك شركه أحسن أو معجبكش الشغل معاهم يكون أحسن طبعاً ليك .. 
ثانيا : عقود العمل في الإمارات نوعين :

1- عقد Limited : بيكون عقد سنتين أو تلاتة أو أربع سنين كحد أقصى و بيتم تجديده بعد كده .. 
مميزاته :

* لو صاحب العمل حب يمشيك قبل إنتهاء التعاقد و بعد فتره التجربة هيدفعلك مرتب 3 شهور كاملين وبيسموها فى القانون تعويض عن الفصل التعسفى .

عيوبه :

* لو إنت اللى حبيت تمشى قبل إنتهاء التعاقد وبعد فترة التجربة لازم تدفعلهم نص مرتب 3 شهور .

* العقد بيكون فترته مقفولة يعنى لو المدة خلصت ومش عايزين يجددولك مش هيجددولك .
----------------------
-------------
------

2- عقد Unlimited : بيكون مفتوح يعني مالهوش مدة محددة ..


مميزاته :

* ممكن تستقيل في أي وقت لو حبيت تسيبهم وتروح علي شركة تانية لكن لازم تديلهم أسباب قانونية ولازم تعمل إخطار لصاحب العمل كتابياً ( بالكتابة ) قبل ما تمشى بمدة إخطار 30 يوم كاملاً .. يعنى قبل ما تمشى من الشغل بشهر كامل لازم تقولهم وتقعد الشهر كامل ده عندهم وبعدين تمشي .

عيوبه : 

* لو صاحب العمل حب يمشيك قبل إنتهاء المدة هيدفعلك مرتب شهر واحد .

--------------------------------------------------------------------


لازم تكون متفق معاهم في العقد علي البدلات والاوفر تايم .. المفروض إن عدد ساعات العمل في الإمارات 48 ساعة في الإسبوع .. أكثر من كده لازم تاخد اوفر تايم ..

والاوفر تايم بيكون 20 % على سعر الساعة العادية ف أيام الشغل العادية أو 50 % في أيام الأجازات


كمان لازم تتفق معاهم على الأجازات .. الأجازة غالباً إما 22 يوم عمل أو 30 يوم فى المطلق .. وشركات كتير بتدفعلك تذكرة الطيران الخاصة بالأجازة كل سنة . 
.

بإختصار يعنى لازم تكون واعى ومصحصح وقت التعاقد ...

----------------------------------------------------------------------------

أسكن فين في الإمارات ؟؟

طبعا كله هيقولك أدخل على دوبيزل وبتاع .. ماشى ماشى ده شئ مفروغ منه بس ده كلام فض مجالس .. أنا هقولك هنا بقى الكلام اللي يجيب الناهيه يا ريس .. اصحى للكلام :D

القصيص / النهده الكرامة / أسعارهم معقولة

المركز المالى غالى لإنه منطقة راقية و فى الشيخ زايد و قريبة من نص البلد كذلك 
( البرشاء ) مش رخيصة ...

بس الغالبية بتسكن فى الشارقة على الحدود مع دبى عشان أرخص من دبى و ناس كتير بتسكن فى المدينة العالمية و دى بعيدة شوية .
السكن فى دبى مشترك ماحدش يقدر يسكن لوحده إلا لو فعلا بيقبض كويس 
الغرفة ممكن يسكن فيها 2 أو 3 أو 10
و كل ما يزيد العدد يقل السعر .
.

ممكن تاخد غرفة فى شقة فى الشارقة ب 2000 درهم مثلاً و 2500 لو بحمام خاص .

الإستوديو ممكن سعره يبقى 3200 درهم و إنت طالع لو على الحدود و ممكن يزيد

الدفع بشيكات مقدمة 12 أو 4 أو 2 شيكات 

و كل ما يزيد عدد الشيكات يزيد السعر 

ده غير شامل الخدمات زى المياه و الكهربا و الغاز و النت .


إيه موضوع الشيكات ده بقى ؟؟؟؟ !!!!

ركز يا معلم شوية معايا في النقطة دى

المرتبات بتنزل فى حسابك فى البنك ... مافيش قبض مانيوال هناك .. يا بتروح تفتح حساب أو شركتك بتفتح لك حساب ... و حساب المرتب بيكون جارى ... بيطلع معاه دفتر شيكات مجانى ...
بتروح حضرتك تأجر شقة أو إستوديو مثلاً

بتكتب العقد و بيكون منصوص فيه إن الإيجار هتدفعه شهرى أو ربع سنوى أو نصف سنوى مثلاً .

لو شهرى يبقى بتكتب ١٢ شيك كل واحد بتاريخ إستحقاق أول كل شهر من شهور السنة ... يوم ٥ مثلاً تكون الرواتب نزلت .

لو ربع سنوى هتكتب أربع شيكات 
لو نصف سنوى هيبقى شيكين ..
الشيكات دى بتتسلم مع العقد
و كل ما تزيد الشيكات كل ما يزيد السعر .

يعنى لو الشقة فرضا إيجارها ١٢ ألف درهم فى السنة على شيكين 
لو طلبت إنهم يبقوا أربع شيكات يبقى الإيجار هيبقى ١٣ فى السنة 
و يزيد أكتر لو بقوا ١٢ شيك يبقى مثلاً ١٤ ألف حسب الاتفاق . 

زى ما قولت بيبقى غالباً السكن مشاركة .... و قليل جداً اللى بياخد إستوديو أو شقة لوحده .
---------------------------------------------------------

فى أنواع إقامات كتير في دبى منها ( إقامة شركة ) و ( إقامة خدم ) وكذا نوع تانى

بس لازم أوضح نقطة بيتنصب علي المصريين بيها .... ( إقامة الشركة ) دى مكلفة جدا ...

و اللى بيعمل الموضوع ده بيبيع فيزا حرة و تمنها بيوصل ل 20000 درهم و أكتر و مدتها سنتين و مالهاش لازمة لإنك مابتشتغلش بيها قانونى ..

و لو لقيت شغل لازم يعمل لك نقل كفالة على الشركة الجديدة ..

-------------------------------------------

فى نهاية الموضوع أتمنى يارب إنى كنت موفق إنى أشرحلكوا وضع العمل إزاى فى الإمارات ... 

ربنا يارب يوفق كل الناس اللى بتسعى لرزقها و عايزة تكسب لقمة عيشها بالحلال
 
ربنا يارب يوفق كل الناس الطموحة اللى عايز تعمل حاجة لنفسها و بتسعى دايماً

فى النهاية أتمنى إنك تشارك الموضوع مع صحابك و زمايلك المهتمين بالشغل فى الإمارات 





ليست هناك تعليقات
إرسال تعليق

إرسال تعليق

الاسمبريد إلكترونيرسالة